倒數一個月。
2018年突然心血來潮，覺得要push自己出去comfort zone決定再次搬走。”再次”，係因為其實由大學住hall已經離開過家，然後有陣零零碎碎嘅日子寄居喺前度屋企，所以唔算第一次搬走。「得閒咪返嚟屋企瞓一兩晚囉。」媽媽仍有講呢一句，但係今次搬出去嘅心情同以往完全唔同：我知道今次我未必會再返去。
其實由我有搬出去呢個諗法到去到實行嘅過程，我係無諗過竟然會有情緒！一直我都係好獨立嘅人，但係原來父母面前，我是可以那麼的弱。
記得搬咗入新居嘅第一晚我落去跑步。同一樣係海旁，但係感覺好陌生好怪。然後返屋企裝好爸爸送俾自己嘅入伙禮物，係一個有香薰味嘅花灑頭，同舊屋同款同味。點知水一灑下就令我回想屋企忍唔住留眼淚。 眼淚雖然係透明，但仍然會喺眼眶阻礙視線，仍然可以感覺到淚水嘅流動，溫度同味道。好記得沖完涼之後望住鏡裏嘅自己，懷疑自己係咪真係喊過。
這就是入伙的第一晚。
我初以為成長對一個過咗二頭字嘅人嚟講，就好似青春期一樣咁遠(哈)...驚覺原來成長唔係變成一個大人，因為technically我已經係一個大人😂，而係認識自己，尤其係面對父母老去嘅勇氣。以前日見夜見唔覺， 搬出去之後就發現父母突然老咗好多(已經堅持一星期至少見一次)🥺，心其實好難受。有一段時間我每晚都瞓唔着，無時無刻都諗緊父母喺屋企做緊啲咩。過咗好一段時間之後，我終於搵到嗰條平行線，搵到接受現實嘅勇氣。曾經係撐起我家嘅巨人們，已經唔需要再為我擋風遮雨....離開咗屋企嘅我，反而更想多啲照顧父母。我又長大多一格喇。
平順安穩嘅日子，總讓人容易忘記家人、伴侶同朋友，永遠陪伴喺自己身邊，硬要遭逢變故，先會發現同對方共渡人生，並非理所當然嘅事。2019年尾，我搵到另一間新屋現正裝修緊，仲有一個月就會搬走。謝謝舊屋給我嘅一切，給我嘅經歷。
2020年，新居將會係我嘅new start。
期待。
#女人像鹽
IG missyboni
Search